ସୁନାବେଡା, ୦୯/୦୭: କୋରାପୁଟ ଜିଲ୍ଲାର ସୁନାବେଡା ଗଷ୍ଟି ସ୍ୱାସ୍ଥ୍ୟ କେନ୍ଦ୍ରକୁ ଯିବା ପାଇଁ ପୁରୁଣା ରାସ୍ତା ଖୋଲିବା ପାଇଁ ସ୍ଥାନୀୟ ବାସିନ୍ଦାମାନେ ଦାବି କରିଛନ୍ତି। ଏହି ରାସ୍ତା ଚର୍ଚ୍ଚ କଲୋନୀ, ବାପୁଜୀ କଲୋନୀ, ପୋଲିସ କ୍ୟାମ୍ପ, ଡିପି କ୍ୟାମ୍ପ, ରାଜୀବ କଲୋନୀ, ଗଞ୍ଜାମ କଲୋନୀ, ହୋଉସିଂ ବୋର୍ଡ, ବୋର୍ଡ କଲୋନୀ, ଚଉରା ଲାଇନ ଆଦି ଅଞ୍ଚଳର ବହୁ ସାହି ଓ ଗାଁର ଲୋକଙ୍କ ପାଇଁ ଏକ ଗୁରୁତ୍ୱପୂର୍ଣ୍ଣ ସଂଯୋଗ ମାର୍ଗ ଥିଲା।
କିନ୍ତୁ କିଛି ବର୍ଷ ହେଲା ଶ୍ରୀ ଅରବିନ୍ଦ ପୂର୍ଣ୍ଣାଙ୍ଗ ଶିକ୍ଷା କେନ୍ଦ୍ର ସମ୍ମୁଖରେ ଏହି ରାସ୍ତା ବନ୍ଦ ରହିଛି, ଯାହା ଫଳରେ ସ୍ଥାନୀୟ ଲୋକଙ୍କୁ ସ୍ୱାସ୍ଥ୍ୟ କେନ୍ଦ୍ର ପହଞ୍ଚିବାରେ ଅସୁବିଧା ହେଉଛି।ସୁନାବେଡା ବାସିନ୍ଦାମାନେ ଅଭିଯୋଗ କରିଛନ୍ତି ଯେ, ପୁରୁଣା ରାସ୍ତା ଖୋଲା ଥିବା ସମୟରେ ସେମାନେ ଶୀଘ୍ର ଗଷ୍ଟି ସ୍ୱାସ୍ଥ୍ୟ କେନ୍ଦ୍ରରେ ପହଞ୍ଚି ଚିକିତ୍ସା ସେବା ପାଇପାରୁଥିଲେ। କିନ୍ତୁ ବର୍ତ୍ତମାନ ରାସ୍ତା ବନ୍ଦ ହେବା ଯୋଗୁଁ ସେମାନଙ୍କୁ ଦୀର୍ଘ ପଥ ଅତିକ୍ରମ କରି ଯିବାକୁ ପଡୁଛି। ଏହା ସହିତ, ଗଷ୍ଟି ସ୍ୱାସ୍ଥ୍ୟ କେନ୍ଦ୍ରରେ ନିତ୍ୟ ପାଣିର ସମସ୍ୟା ଦେଖାଦେଉଛି, ଯାହା ରୋଗୀଙ୍କ ଚିକିତ୍ସାରେ ଅଧିକ ବାଧା ସୃଷ୍ଟି କରୁଛି। ଅଳ୍ପ ସ୍ୱାସ୍ଥ୍ୟଗତ ସମସ୍ୟା ହେଲେ ମଧ୍ୟ ରୋଗୀମାନଙ୍କୁ କୋରାପୁଟର ସହୀଦ ଲକ୍ଷ୍ମଣ ନାୟକ ସ୍ୱାସ୍ଥ୍ୟ କେନ୍ଦ୍ରକୁ ସ୍ଥାନାନ୍ତର କରାଯାଉଛି, ଯାହା ସ୍ଥାନୀୟ ଲୋକଙ୍କ ପାଇଁ ଅତିରିକ୍ତ ଅସୁବିଧା ଓ ଖର୍ଚ୍ଚ କାରଣ ହେଉଛି।ସ୍ଥାନୀୟ ବାସିନ୍ଦାମାନେ ଆହୁରି ଅଭିଯୋଗ କରିଛନ୍ତି ଯେ, ଗଷ୍ଟି ସ୍ୱାସ୍ଥ୍ୟ କେନ୍ଦ୍ରରେ ଆବଶ୍ୟକୀୟ ସୁବିଧାର ଅଭାବ ରହିଛି। ରୋଗୀମାନଙ୍କୁ ସଠିକ ସମୟରେ ସେବା ମିଳୁନାହିଁ, ଏବଂ ସ୍ୱାସ୍ଥ୍ୟ କର୍ମଚାରୀଙ୍କ ଅବହେଳା ଯୋଗୁଁ ଚିକିତ୍ସା ପ୍ରକ୍ରିୟା ବାଧାପ୍ରାପ୍ତ ହେଉଛି। ଏହି ସମସ୍ୟାଗୁଡିକର ସମାଧାନ ପାଇଁ ସୁନାବେଡା ବାସିନ୍ଦାମାନେ ସୁନାବେଡା ପୌର ପରିଷଦ ଓ କୋରାପୁଟ ଜିଲ୍ଲା ପ୍ରଶାସନକୁ ଅନୁରୋଧ କରିଛନ୍ତି। ସେମାନେ ରାଜ୍ୟ ସରକାରଙ୍କ ନିକଟରେ ମଧ୍ୟ ଏହି ସମସ୍ୟାର ସମାଧାନ ପାଇଁ ଦାବି ରଖିଛନ୍ତି।ସ୍ଥାନୀୟ ଲୋକେ କହିଛନ୍ତି ଯେ, ପୁରୁଣା ରାସ୍ତା ଖୋଲାଗଲେ ସ୍ୱାସ୍ଥ୍ୟ କେନ୍ଦ୍ରରେ ପହଞ୍ଚିବା ସହଜ ହେବ, ଏବଂ ପାଣି ଓ ଅନ୍ୟାନ୍ୟ ସୁବିଧାର ଉନ୍ନତି ହେଲେ ସ୍ଥାନୀୟ ବାସିନ୍ଦାମାନେ ସାଧାରଣ ଚିକିତ୍ସା ପାଇଁ ଅଧିକ ନିର୍ଭରଶୀଳ ହୋଇପାରିବେ। ଏହି ଦାବିର ଶୀଘ୍ର ସମାଧାନ ହେବା ନେଇ ସୁନାବେଡା ବାସିନ୍ଦାମାନେ ଆଶାବାଦୀ ଅଛନ୍ତି।
